- Подробности
-
Категория: Главное
-
Создано 20.05.2021 06:36
-
Автор: Балзина Атимтаева
-
Просмотров: 14336
«Мен үшін Президентіміз Қасым-Жомарт Кемелұлымен кездесу үлкен құрмет және мәртебе» деп бастады сөзін біздің кейіпкеріміз.
Еркен Назаров- бәрімізге таныс есім. Ауданымыздағы жастар орталығының басшысы, әрі аудан мәслихатының депутаты-Еркін өзінің Президентіміз Қасым-Жомарт Тоқаевпен жүздескендегі әсерімен бөлісті.
- Бұл мен үшін тарихи сәт десем де болады. 2019 жылы бәрімізге белгілі, Ресей мен Қазақстанның волонтер жастары мен қоғамдық ұйымдар өкілдерінің қатысуымен «Волонтерлік – жастардың әлеуметтік лифті» атты Қазақстан-Ресей жастар форумы өтті. Сол форумға еліміздің көшбасшысы Қасым-Жомарт Тоқаевта қатысқан еді. Өзінің жылы лебізін білдірген сәтте, барлығымыздың қанатымыз қатайып, әрі қарай талай шыңдарды бағындыруға күш алдық десек болады. Айтылған әрбір сөзі біз үшін мотивация болды. Форумда волонтер жастар Қазақстан Президенті алдында өздерінің үздік жобаларының тұсаукесерін жасады және ұсыныстарын айтты. Олардың әрқайсысынан игілік пен ізгіліктің, қайырымдылық пен мейірімділіктің шапағаты нұр шашып тұрғандай. Мен достық салтанат құрған осы залда жарқын көңілді, өзара түсініскен, игі мақсаттар жолында бірге болуды қалаған жастарды көргеніме қуаныштымын!,- дейді Еркен Назаров.
Сонымен қатар, 2020 жылы «Еріктілер жылы» деп белгіленген еді. Сол маңызды сәтте де Еркен Президентімізбен кездесіп, өзін тағы бір шыңды бағындырғандай әсерде жүргенін айтты.
- 2020 жыл «Еріктілер жылы» болып бекітілді. Басты мақсат – ерікті қызметке азаматтарды, әсіресе, жастарды тарта отырып, белсенді өмірлік ұстанымын қалыптастыру болып табылған еді. Осы іс-шарада біз өзімізге керекті дүниені, әсерлі жолдауды Президентімізден естідік. Еліміздің болашағы жастардың қолында екені баршамызға мәлім. Сол себепті, Отан алдында аянбай еңбек етуімізді айтқан Президентіміздің бұл сөздері сол залда отырған әрбір жанның жанына жылы болып тигені анық деп айта аламын. Мен, ауданымыздың жастарының әрі қарай қарқынды жетістерге жетуіне, Отан алдындағы міндеттерін атқаруға көмектесуге бар күг-жігерімді саламын. Себебі, Отан бәрімізге-ортақ.Ал, мен бірінші кезекте елімнің Еріктісімін, белсенді азаматымын,- деп, аяқтады өз сөзін.
Ерікті болудың ерлікпен тең екенін жадымызда сақтайық. Олардың ерең еңбегі ақталып, азаматтық қоғамның дамуында әрбір жеке тұлғаның құндылығын арттырып, игі іс жасауға талпындырады деп сенейік. Ал, жастарымызды өз қанатына алған Еркен Назаровқа алдағы жұмысына сәттілік тілейміз!