Сайт газеты МАЯК

Ұлы ақынның өлмес мұрасы

Подробности

Категория: Последний номер

Создано 06.08.2026 10:38

Автор: Super User

Просмотров: 90

10 тамыз – Қазақстанда ұлы ойшыл, ақын, ағартушы, қазақ жазба әдебиетінің негізін қалаушы Абай Құнанбайұлының құрметіне белгіленген Абай күні.

Бұл күн – халқымыздың рухани құндылықтарын дәріптеп, кемеңгер ақынның мол мұрасын кеңінен насихаттайтын, жас ұрпақты білімге, адамгершілікке, ұлттық мәдениетке тәрбиелейтін маңызды мереке.
Абай Құнанбайұлының шығармалары ғасырлар бойы өзектілігін жоғалтқан емес. Оның өлеңдері мен қара сөздерінде ел бірлігі, ғылым-білім, еңбек, әділдік, ар-ождан, адамгершілік сияқты мәңгілік құндылықтар көрініс тапқан. Сондықтан да Абай мұрасын оқып-үйрену – ұлт руханиятын байытудың, ұлттық сананы қалыптастырудың маңызды жолдарының бірі.
Осы атаулы күн қарсаңында еліміздің барлық кітапханаларында Абай шығармашылығын кеңінен насихаттауға бағытталған түрлі мәдени-ағартушылық іс-шаралар ұйымдастырылуда. Әдеби кештер, кітап көрмелері, поэзия сағаттары, танымдық кездесулер, онлайн жобалар мен челлендждер арқылы оқырмандар ұлы ақынның өмірі мен шығармашылығына тағы бір мәрте назар аударып, оның мол мұрасымен жақынырақ танысуда.
Бейімбет Майлин ауданының орталықтандырылған кітапхана жүйесінде де Абай күніне арналған іс-шаралар жоспарына сәйкес мазмұнды мәдени бағдарламалар өткізілуде. Жүйедегі барлық ауылдық кітапханаларда кітап көрмелері, әдеби оқулар, тақырыптық кездесулер мен ақпараттық сағаттар ұйымдастырылып, оқырмандар арасында Абай мұрасын насихаттау жұмыстары белсенді жүргізілуде.
Аудандық орталық кітапханада Абай Құнанбайұлының шығармашылығына арналған «Абай даналығы – халық мұрасы» атты кең көлемді кітап көрмесі ұйымдастырылды. Көрмеге ақынның өлеңдер жинақтары, қара сөздері, поэмалары, ғылыми-зерттеу еңбектері, өмірі мен шығармашылығына арналған әдебиеттер, сондай-ақ Абайтану бағытындағы басылымдар қойылған. Көрме оқырмандардың ерекше қызығушылығын тудырып, ұсынылған кітаптарға сұраныс күн сайын артып келеді. Кітапханаға келушілер ақынның шығармаларын оқып қана қоймай, оның рухани мұрасымен тереңірек танысуға мүмкіндік алуда.
Сонымен қатар аудандық орталықтандырылған кітапхана жүйесінің бастамасымен әлеуметтік желілерде ауданның мемлекеттік қызметкерлері арасында «Абайды бірге оқиық» атты челлендж ұйымдастырылды. Челлендждің негізгі мақсаты – Абай шығармаларын көпшілікке кеңінен таныту, кітап оқу мәдениетін қалыптастыру және қоғамда рухани құндылықтарды дәріптеу. Челленджге қатысушылар ұлы ақынның өлеңдері мен қара сөздерінен үзінділер оқуда.
Абай күніне арналған барлық іс-шаралар оқырмандардың әдебиетке деген сүйіспеншілігін арттырып, ұлттық мәдени мұраға деген құрметін нығайтуға бағытталған. Ұлы ақынның даналыққа толы мұрасы бүгінгі қоғам үшін де өз маңызын жоғалтпай, әрбір қазақстандықты білімге, еңбекке, ізгілікке және елін сүюге үндей береді. Абайдың асыл мұрасын ұлықтау – өткенге тағзым ғана емес, келешек ұрпақтың рухани дамуына салынған берік негіз. Сондықтан кітапханаларда ұйымдастырылып жатқан осындай тағылымды шаралар ұлт руханиятын байытуға, кітап оқуды насихаттауға және Абай шығармашылығын жаңа буынға кеңінен танытуға зор үлес қоса береді.
Кітап сүйер қауымды кітапханаларға келіп, Ұлы ақынның шығармашылығымен кеңінен танысуға шақырамыз!

• < Назад
• Вперёд >