Сайт газеты МАЯК

Теміржолға адалдық - абыройлы еңбек

Подробности

Категория: Последний номер

Создано 06.08.2026 10:40

Автор: Майра Дүзбайқызы

Просмотров: 92

Теміржол – мемлекет экономикасының тірегі, ел мен елді, қала мен ауылды жалғайтын стратегиялық маңызды сала.

Мыңдаған шақырымға созылған болат жол бойында тәулік бойы тынымсыз еңбек етіп жүрген теміржолшылардың қажырлы қызметінің арқасында жолаушылар діттеген жеріне аман жетіп, жүк тасымалы үздіксіз жүзеге асады. Бұл – үлкен жауапкершілік пен жоғары кәсібилікті талап ететін мамандық.
Теміржолшылар күні – осы саланың өркендеуіне өлшеусіз үлес қосып жүрген еңбек адамдарына құрмет көрсететін ерекше мереке. Осындай өз ісіне адал, ширек ғасырдан астам уақытын теміржол байланысы саласына арнаған азаматтардың бірі - Тобыл сигнализация және байланыс дистанциясының (ШЧ-18) байланыс электромеханигі, адал еңбек етіп, ел игілігі үшін қызмет етіп жүрген мамандардың бірі - Аубакиров Асхат Какимжанұлы.
Асхат Какимжанұлы теміржол саласындағы еңбек жолын 2001 жылдың сәуір айында байланыс электромонтері болып бастады. Өз ісіне деген жауапкершілігі мен білімге ұмтылысының арқасында Павлодар қаласындағы ДТША оқу орнын тәмамдап, байланыс электромеханигі қызметіне тағайындалды. Еңбек жолында ол еліміздің теміржол инфрақұрылымын дамытуға елеулі үлес қосты. 2004 жылы Алтынсарин–Хромтау теміржол учаскесіндегі байланыс құрылғыларын салу және іске қосу жұмыстарына белсене қатысты. Ал 2011 жылы Ресей темір жолынан берілген Тобыл–Елімай учаскесіндегі стансалардың байланыс жүйелерін қабылдау және пайдалануға беру жұмыстарына қатысып, өзінің кәсіби тәжірибесін тағы бір мәрте дәлелдеді. Бір қызығы, ширек ғасырлық еңбек жолының барлығы бір цехта өтті. Осы уақыт ішінде технологиялар жаңарып, байланыс құралдары заман талабына сай жетілдірілгенімен, Асхат Какимжанұлы өз жұмыс орнына деген адалдығын сақтап келеді. Оның пікірінше, уақыт өзгерсе де, еңбекке деген жауапкершілік пен кәсібіне деген сүйіспеншілік ешқашан өзгермейді.
- Осы 25 жылдың ішінде көптеген өзгерістер болды. Жаңа технологиялар енгізілді, жабдықтар жаңартылды. Бірақ біздің басты міндетіміз – пойыз қозғалысының қауіпсіздігін қамтамасыз ететін байланыс жүйелерінің үздіксіз жұмысын сақтау. Байланыс электромеханигінің еңбегі ауа райына да, тәулік уақытына да қарамайды. Кез келген ақауды жедел анықтап, күрделі технологиялық мәселелерді дер кезінде шешуге әрдайым дайын боламыз. Осындай жауапты істе туған ұжымның қолдауы ерекше күш береді, – дейді Асхат Какимжанұлы.
Теміржолшының айтуынша, әрбір еңбек жетістігінің артында отбасының қолдауы жатыр. Бұл мамандыққа деген сүйіспеншілік әулетінде жалғасын тауып, бүгінде қызы да осы байланыс саласында еңбек етуде. Бұл – мамандыққа деген құрмет пен сабақтастықтың жарқын көрінісі. Асхат Какимжанұлы еңбек ететін ШЧ-18 ұжымы – бір мақсатқа жұмылған, кәсібіне адал мамандардың ұйымшыл командасы. Олар тәулік бойы теміржол байланыс жүйелерінің сенімді жұмысын қамтамасыз етіп, қозғалыс қауіпсіздігіне өз үлестерін қосып келеді. Теміржолшылар күні қарсаңында Асхат Какимжанұлы сияқты өз кәсібіне адал, ел игілігі жолында аянбай еңбек етіп жүрген азаматтардың еңбегі зор құрметке лайық. Осындай білікті мамандардың арқасында теміржол саласы тұрақты дамып, жолаушылар мен жүк тасымалының қауіпсіздігі қамтамасыз етілуде.
Теміржолшының адал еңбегі – елдің өркендеуіне қосылған қомақты үлес. Осындай еңбек адамдарының тәжірибесі мен жауапкершілігі жас буынға үлгі болып қала бермек.

• < Назад
• Вперёд >