Сайт газеты МАЯК

Теміржол - үлкен жауапкершілік пен тәртіпті талап ететін сала

Подробности

Категория: Последний номер

Создано 06.08.2026 10:44

Автор: Майра Дүзбайқызы

Просмотров: 91

Теміржол – ел экономикасының күретамыры, ал теміржолшылар – осы алып жүйенің үздіксіз жұмысын қамтамасыз ететін еңбек адамдары.
Тәулікпен санаспай қызмет атқаратын әрбір маманның еңбегі жолаушылардың қауіпсіздігі мен жайлылығына бағытталған. Солардың қатарында вокзал дикторларының да орны ерекше. Олардың анық, сенімді әрі жылы дауысы жолаушыларға дұрыс бағыт-бағдар беріп, сапардың сәтті басталуына ықпал етеді. Теміржолшылар күні қарсаңында өз ісіне адал, жауапкершілігі жоғары, Тобыл станциясы теміржол вокзалының анықтама беру кезекшісі – диктор Рахимова Раушан Кенжешқызының еңбегіне тоқталғанды жөн көрдік. Бұл жүйеде әр маманның еңбегі маңызды. Солардың бірі – жолаушыларға қажетті ақпаратты дер кезінде жеткізіп, сапардың жайлы әрі қауіпсіз өтуіне үлес қосатын вокзал дикторлары.
Рахимова Раушан Кенжешқызы 1986 жылдың 15 наурызында дүниеге келген. Арнаулы орта білім алып, теміржол көлігі саласы бойынша инженер мамандығын игерген. 2019 жылдан бастап Тобыл станциясының теміржол вокзалында анықтама беру кезекшісі – диктор қызметін абыроймен атқарып келеді. Раушан Кенжешқызы – бес баланы тәрбиелеп отырған жас, көпбалалы ана. Отбасындағы мейірімі мен жауапкершілігін қызметінде де айқын көрсете біледі. Әріптестері оның сабырлылығын, ұқыптылығын және еңбекке деген адалдығын ерекше бағалайды. Тобыл вокзалында төрт диктор қызмет атқарса, солардың ішінде Раушан Кенжешқызының дауыс мәнері анық, сөйлеу мәдениеті жоғары, хабарламаларды сауатты әрі әсерлі жеткізе білуімен ерекшеленеді. Сондықтан әріптестері оны «табиғи талантты диктор» деп атайды. Диктордың негізгі міндеті – жолаушыларды пойыздардың келуі мен жөнелтілу уақыты, бос орындардың болуы, билет кассаларының жұмыс тәртібі, вокзалдағы қызмет түрлері, медициналық көмек көрсету орындары және өзге де маңызды ақпараттар туралы мемлекеттік және орыс тілдерінде уақытылы хабардар ету. Бұл – үлкен жауапкершілік пен мұқияттылықты талап ететін қызмет. Раушан Кенжешқызы өзіне жүктелген міндеттерді жоғары кәсібилікпен орындап, жолаушыларға сапалы қызмет көрсетуге лайықты үлес қосып келеді. Оның сыпайы қарым-қатынасы, анық әрі жағымды дауысы көптеген жолаушылардың ризашылығына ие болып жүр.
Теміржолшылар күні қарсаңында Рахимова Раушан Кенжешқызын кәсіби мерекесімен шын жүректен құттықтаймыз! Отбасына амандық, бала-шағасына бақ-береке, еңбегіне толайым табыс, деніне саулық, қызметіне жаңа жетістіктер тілейміз. Теміржол саласындағы абыройлы еңбегі әрдайым ел игілігіне қызмет ете берсін!

• < Назад
• Вперёд >