Сайт газеты МАЯК

Тобыл мектептерінде жаңа оқу жылы басталды

Подробности

Категория: Последний номер

Создано 02.09.2026 15:25

Автор: Майра Дүзбайқызы

Просмотров: 42

Жаңа оқу жылы – әр бала үшін жаңа білімге, жаңа мүмкіндіктерге бастайтын ерекше кезең. Әсіресе мектеп табалдырығын алғаш аттаған бүлдіршіндер үшін бұл күннің орны бөлек. Тобыл кентіндегі білім беру ұйымдарында да жаңа оқу жылы көтеріңкі көңіл-күймен басталып, мектептер өз оқушыларын қарсы алды.

Биыл Тобыл кентінің мектептерінде барлығы 846 оқушы білім алады. Олардың қатарында алғаш рет мектепке қадам басқан 82 бірінші сынып оқушысы бар. Кеше ғана балабақшада тәрбиеленген бүлдіршіндер енді білім ордасының есігін ашып, ұстаздарымен танысып, өздерінің ұзақ білім жолына алғашқы қадамдарын жасады. Бірінші сыныпқа бару – бала өміріндегі маңызды кезеңдердің бірі. Алғашқы қоңырау, мектеп формасы, жаңа достар, алғашқы оқулықтар мен ұстаздың жылы сөзі әр баланың жадында ұзақ сақталары сөзсіз. Сондықтан мектеп ұжымдары жас бүлдіршіндердің жаңа ортаға тез бейімделіп, білім алуға деген қызығушылығын арттыруға ерекше көңіл бөлуде. Жаңа оқу жылындағы тағы бір маңызды жаңалық – Тобыл мектептеріне 13 жас мұғалімнің жұмысқа келуі. Жас мамандардың білім саласына қосылуы мектеп ұжымдарына жаңа серпін беріп, заманауи әдіс-тәсілдерді оқу үдерісіне енгізуге мүмкіндік береді. Жас ұстаздар өздерінің білімі мен ізденісін оқушылармен бөлісіп, олардың жан-жақты дамуына үлес қосуға ниетті.
Ұстаздық – үлкен жауапкершілікті талап ететін мәртебелі мамандық. Әр мұғалімнің басты міндеті – оқушыға сапалы білім беріп қана қоймай, оның бойындағы жақсы қасиеттерді қалыптастырып, болашаққа сеніммен қадам басуына бағыт көрсету. Осы жолда тәжірибелі ұстаздардың жас мамандарға көрсететін қолдауы да маңызды. Аға буынның тәжірибесі мен жас педагогтердің жаңашылдығы ұштасқан жағдайда білім беру саласында жақсы нәтижелерге қол жеткізуге болады. Бүгінде мектеп – тек білім беретін мекеме ғана емес, жас ұрпақтың тұлға болып қалыптасатын ортасы. Мұнда бала біліммен қатар достықты, жауапкершілікті, еңбекқорлықты, отансүйгіштікті үйренеді. Сондықтан мектептегі әрбір оқу жылы жаңа мақсаттар мен үлкен міндеттерден басталады.
Жаңа оқу жылының басталуымен бірге Тобыл мектептерінің алдында да жаңа жоспарлар мен биік мақсаттар тұр. Ұстаздар қауымы оқушылардың білім сапасын арттырып, олардың шығармашылық және зияткерлік қабілеттерін дамытуға күш салмақ. Жаңа оқу жылы барша оқушыға сәттілік, ұстаздарға шығармашылық табыс, ата-аналарға қуаныш әкелсін! Әрбір мектеп оқушысы білім биіктерін бағындырып, Тобылдың ғана емес, еліміздің жарқын болашағына өз үлесін қоссын!

• < Назад
• Вперёд >