Сайт газеты МАЯК

«Ыбырайдың қоңырауы - болашаққа аманат»

Подробности

Категория: Главное

Создано 02.09.2026 15:26

Автор: Мадина МУХАМБЕТЖАНОВА

Просмотров: 109

1 қыркүйек - Білім күні «Сапар Ерғалиев атындағы жалпы білім беретін мектебі» КММ-де «Ыбырайдың қоңырауы - болашаққа аманат» атты салтанатты жиынмен аталып өтті. Мерекелік шараға мектеп ұжымы, оқушылар, ата-аналар және арнайы қонақтар қатысты.

Жиынға аудан әкімі Мыржақыпов Қайсар Батырханұлы мен аудандық білім бөлімінің басшысы Алимбаева Айгүл Темірханқызы қатысып, ұстаздар мен оқушыларды жаңа оқу жылымен құттықтап, сәттілік тіледі. Мектеп директоры Коскадамова Тамаша Шамелқызы да ізгі тілегін білдірді.
Биылғы алғашқы қоңырау мектептің 25 жылдық мерейтойымен ерекшеленді. Осыған орай білім ордасының дамуына елеулі үлес қосқан ардагер ұстаздар мен мектеп жанашырлары - Шоңғалова Гүлсин Жұмагүлқызы, Альмухамбетова Муглсин Апошқызы, Мурзагазин Марат Баризжанұлы, Сапабекова Әсем Сағымбайқызы құрметке бөленді.
Мерекелік шарада ата-аналар атынан Асанова Айниса Жақсылыққызы сөз сөйлеп, ұстаздарға алғыс білдіріп, оқушыларға ақ жол тіледі.
Алғашқы қоңыраудың ерекше сәтінде 11-сынып оқушылары мектеп табалдырығын алғаш аттаған бүлдіршіндерге жетекшілік жасап, естелік сыйлықтарын табыстады. Бұл - ұрпақтар сабақтастығы мен мектеп дәстүрінің жарқын көрінісі болды.
Алғашқы қоңырау үні бүлдіршіндер үшін білім әлеміне бастар алғашқы қадамды білдірсе, түлектер үшін үлкен өмірге бастар жауапты кезеңнің басталуын аңғартты.
«Ыбырайдың қоңырауы – болашаққа аманат» атты мерекелік жиын ұлы ағартушы Ыбырай Алтынсариннің «Кел, балалар, оқылық!» деген өсиетімен үндесіп, жас ұрпақты білімге ұмтылуға шақырды.
Жаңа оқу жылы мектеп ұжымына жаңа жетістіктер, оқушыларға сәттілік, ұстаздарға шығармашылық табыс әкелсін!

• Вперёд >