Сайт газеты МАЯК

Күміс тойыңыз құтты болсын!

Подробности

Категория: №15 (10335) от 12 апреля 2018 года

Создано 11.04.2018 15:12

Просмотров: 4244

Осы аптада бәріміз асыға күтетін Қозы Көрпеш – Баян Сұлу, яғни ғашықтар күні есігімізді қаққалы жатыр. Бағзы заманнан бері махаббат сезіміне өртенбеген жан баласы кем де кем шығар. Әр дәуірдің өзінің Қозысы мен Баяны болады десек артық айтқанымыз болмас. Бұл екі ғашықтың есімдері тарих беттерінде алтын әріппен жазылса, бүгінгі кейіпкерлеріміз Махаббат пен Бақытжанның есімдері Баймағамбетовтар әулетіндегі өнегелі отбасылардың бірі болып табылатынына күмән жоқ.

«Бақытты отбасын құру екі-ақ адамның қолынан келеді. Ол үшін екеуі де парасатты, әр ісіне адал, ағайын-туғанға қайырымды, бір-біріне бауырмал, сыйлы болуы керек. 1993 жылы отауымызға келін болып түскен Махаббат алғашқы күндерінен-ақ бізге ғана емес, ата-енесіне де сыйлы болды. Бақытжан отбасымыздың жалғызы, әрі кенжесі, Махаббат тым жас болғанымен, олар жаңа бір шаңырақтың отын тұтатып, Байдрахман әкеміз бен Жұмаш анамызға қамқор бола білді. Кемпір мен шалдың қолында болған жастар өздеріне жүктелген жауапкершіліктің зор екенін түсінді. «Қайын ененің топырағынан» деп тегін айтылмаса керек. Бұл сөздің мәнін кезінде елеп-ескермеп едік. «Тастай батып, судай сіңген» келініміздің мінезінің анамызға тартқанын бауырларым да растайды», - дейді Бақытжанның апасы Балсары Қарымсақова. Қазағымыз «келіні жақсының керегесі алтын» деуші еді ғой. Рас екен. Жолдасының апалары мен жезделерін, жиендерін, туысқандарын әрдайым күлімсіреп қарсы алатын Махаббат пен қайын жұртына жанашыр күйеу бала бола білген Бақытжанның есігі әрқашан да ашық. «Жалғыз нағашымызбен қалжыңдассақ та, жеңгемізге еркелесек те, олардың орны біз үшін ерекше», - дейді отағасының жиендері.

Бақытжан мен Махаббаттың шаңырақ көтергеніне де биыл 25 жыл болады екен. Менменсімейтін жандардың бірі болып табылатын жандардың ойынша, баланың жан-жақты тәрбиелі болып өсуіне берекелі, ынтымақты жанұяның ықпалы мол. Сондықтан, «ұяда не көрсең, ұшқанда соны ілерсің» деген қағиданы ұстанатын жұбымыз қызы Күнсұлу мен ұлы Бейімбеттің тәрбиесіне аса мән беретінін алға тартады. Шаңырағы биік, босағасы берік Баймағамбетовтар отбасының мүшелері барша тарандықтардай таң атса, бірі - қызметіне, бірі - оқуына, кеш батса, үйіне асығады. Әр кеш сайын, сағынып кездескендей, шүйіркелесіп жатқаны. Тәңіріміз сіздерді осы бақытты күндерден айырмасын. Ғашықтарды пәк сезіммен нұр сепкен мерекесінің қарсаңында Бақытжан мен Махаббатты күміс тойымен құттықтауға рұқсат етіңіздер!

• < Назад
• Вперёд >