Сайт газеты МАЯК

Сөз құдіретін білетіндер сынға түсті

Подробности

Категория: №11 (10331) от 15 марта 2018 года

Создано 15.03.2018 06:24

Просмотров: 2526

Дүйсенбі күні «Достық» мәдени-танымдық орталығының оқу залында «Рухани жаңғыру: болашаққа бағдар» бағдарламасының аясында, Астананың 20 жылдығы мен Дүниежүзілік кітап және авторлық құқық күнімен ұштастырылған облыстық «Сөз құдіреті» мәнерлеп оқу байқауының аудандық кезеңі өтті.

Айта кету керек, байқауға таңдалатын туынды қазақстандық жазушылардың шығармаларымен, яғни жасөспірімдер үшін жазылған туындылары немесе балалар мен жасөспірімдер әдебиеті шеңберіне енген шығармалармен шектелді. Шарт бойынша аталмыш байқауға 12-13 жас аралығындағы мектеп оқушылары ғана қатысуы тиіс еді. Ұйымдастырушылардың сөзіне сүйенсек, бұл байқаудың негізгі мақсаттарының бірі балалардың әртістік шеберлігін шыңдап, өз талаптарын көрсетуге мүмкіндік беру болатын.

Аудандық орталықтандырылған кітапхана жүйесінің басшысы Гаухар Асанова «Сөз құдіреті» сайысына қатысқан он екі оқушыға сәттілік тілеп, сөз кезегін жүргізушілерге берді. Шыны керек, аталмыш додада қазылық жасаған мәдениет бөлімінің бас маманы Гүлсім Мурзабаеваға, тілдерді оқыту орталығының басшысы Әлия Еришева мен «Ұшқын» мәдениет үйінің көркемдік жетекшісі Айман Зыбалеваға қатысушылардың өнерін бағалау оңайға түскен жоқ. Дегенмен, қатысушылардың оқылымын бағалау барысында таңдап алынған шығарманың өзіндік ерекшелігі, сөйлеу мәнері мен анықтығы, мәтіннің бейнелік жүйесі мен мазмұндық құрылымын терең сезіну сынды негізгі белгілерге аса мән берген әділқазылар алқасы он балдық жүйемен өз бағаларын бере отырып, өз ойларын ортаға салды. «Мәтінді жаттап алып қана қоймай, оны жеткізе білу де өнер десем артық айтқаным болмас. Сондықтан, прозаны лайықты оқу үшін эмоционалдық-экспрессивтік көркемдіктің қыр-сырына үйретіп, сендерді осы байқауға дайындаған педагогтар мен кітапханашыларға алғысымды білдіремін. Қатысушылардың кейбіреулері менің жүрегімде із қалдырып, жылы әсер етті.Бүгінгі сайыста шығарманы жаттағанымен, лайықты жеткізе алмаған, яғни дайындығы аздау балалар да бар. Бірақ, бұл сендердің жеңілгендерің емес, керісінше, алға қадам басу үшін өзіндік ынталандырма болуы тиіс. Мені балалардың арасында әртістік шеберлігімен, дауыс ырғағымен, дене қимылымен туындыны әсерлі етіп жеткізгендердің бары қуантты. Оқушы болсаңдар да, кітаптарға, күрделі шығармаларға қызығушылық арттырып, осы байқауға келгендерің үшін сендерге ду қол шапалақ дегім келеді», - деді «Туған өлкем – алтын бесігім» кітабының авторы, қазылар алқасының мүшесі Айман Зыбалева. Иә, бұл дүниеде сөздің құдіретіндей құдірет жоқ. Расында да солай ғой, бір ауыз сөзбен ешбір күн шалмас қараңғы түнекке сәуле шашуға болады. Бір ауыз сөзбен кеселді жазуға да болады. Бір ауыз сөзбен өлтіруге де болады. Ғабит Мүсірепов: «Мұралардың ең асылы – сөз. Асылы адам да, зат та тозады, жоғалады. Ал, сөз мәңгі жасайды...», - дейді.

Сайыс бар жерде жеңіс те, жеңіліс те болатыны белгілі. Қазылар алқасының шешімімен 3-орынды Б.Майлин атындағы орта мектептің 5-сынып оқушысы Ансатасия Забайдулина иеленсе, 2-орын Приозерный орта мектебінің 6-сынып оқушысы Жансұлу Қаппасқа бұйырды. Ал, 1-орынды және облыстық «Сөз құдіреті» мәнерлеп оқу байқауына жолдаманы Майское орта мектебінің 7-сынып оқушысы Дарья Стоногина иемденді (фотосуретте). Сонымен қатар, «Айрықша таңдау» номинациясымен Николаевская негізгі мектебінің 5-сынып оқушысы Данил Бирюков, «Үздік бейне» номинациясымен Валерьяновка негізгі мектебінің 7-сынып оқушысы Яна Никкель, «Әртістік шеберлік» номинациясымен Тобыл орта мектебінің 6-сынып оқушысы Назира Қуаныш марапатталды. Байқауда бағын сынаған қалған қатысушылар алғыс хаттарға және естелік сыйлықтарға ие болды.

• < Назад
• Вперёд >