Тыл еңбеккерлері - Жеңіс туын жақындатқандар

Подробности: Категория: Последний номер; Создано 08.05.2025 09:07; Автор: Super User; Просмотров: 104

Ұлы Отан соғысы жылдарында (1941–1945) майдан даласында қан төккен жауынгерлермен бірге тылда жан аямай еңбек еткен жандардың да ерлігі ұмытылмайды.
Олар – егін даласында, зауыт пен фабрикада, мектеп пен ауруханада, әр салада қажымай-талмай еңбек еткен қарапайым азаматтар.
Соғыс басталысымен елдегі барлық күш майдан мен тыл қажеттіліктеріне бағытталды. Ер-азаматтардың көпшілігі майданға аттанған соң, ауыр еңбек әйелдер мен балалардың, қарттардың мойнына түсті. Олар күн-түн демей егін егіп, астық бастырып, соғысқа қажетті өнім өндірді. Қан майданға киім-кешек, азық-түлік, оқ-дәрі жіберу – тылдағы еңбек адамдарынан үлкен табандылықты талап етті. Осындай жандардың бірі Тобыл тұрғыны Зонова Анна Ивановна. Ұлы Отан соғысы жылдары әрбір азамат ел қорғау жолында жан аямай еңбек етті. Қиын-қыстау заманда тылда қалған балалар да ересектермен қатар ауыр жұмыстарға жегілді. Анна Ивановна кішкентайынан соғыс ауыртпалығын сезініп, еңбекке араласты. Әкесі майданға аттанып, анасы колхозда жұмыс істеді. Жас Анна күн сайын таңмен таласа тұрып, картоп жинауға көмектесті. Қыстың қақаған суығында да, жаздың аптап ыстығында да тыным таппай еңбек етті. Балалық шағы ойын-күлкісіз өтсе де, Отан алдындағы борышын терең сезініп, еңбекке шын жүректен берілді. Бүгінде Анна Ивановна - тыл ардагері. Оның балалық шағы мен тылдағы еңбегі - өскелең ұрпаққа үлгі. Ол соғыс кезіндегі балалардың қандай қиындықтарға тап болғанын еске ала отырып, бейбіт өмірдің қадірін білуге үндейді. Зонова Анна Ивановна 9 мамыр Жеңістің 80 жылдығына мерейтой медалімен марапатталды.
Тыл ардагерлерінің сол кездегі еңбегі – төзімділік пен ерліктің үлгісі. Олар майдан мен ел арасындағы алтын көпір болды. Бүгінгі бейбіт күніміз – сол кісілердің жанқиярлық еңбегінің арқасы. Жылдар өтсе де, тыл еңбеккерлерінің өнегелі өмір жолы – жас ұрпаққа үлгі. Олардың ерлігі ел жадында мәңгі сақталады. Тылдағы әйелдер – Жеңісті жақындатқан жандар. Ұлы Отан соғысы жылдарында әйелдер ел тағдырына түскен ауыртпалықты ерлермен тең бөлісті. Майданға кеткен ер-азаматтардың орнын басып, олар тылда ерен еңбек етті, ауыр физикалық еңбектен қорықпады. Олар төзімділік пен қайсарлықтың жарқын үлгісін көрсетті. Соғыс жылдарындағы әйелдердің еңбегі мен ерлігі – тек тарих емес, ол бүгінгі ұрпаққа өнеге. Олар елдіктің, еңбектің және аналық жүректің шексіз мейірімін паш етті.