Сайт газеты МАЯК

Қанаттың іс-әрекеті жастарға үлгі

Подробности

Категория: Последний номер

Создано 02.05.2019 06:25

Автор: Өз тілшімізден

Просмотров: 314

«Өжеттілік пен қайсарлық – жауынгердің, тіпті мүмкін емес деген жағдайдың өзінде өз өмірін абыроймен өлімге бас тігуге тәуекел етушілік, игілікті құлшыныс...» деп Бауыржан Момышұлы айтқандай, әскери борышқа адалдық танытқан әрбір жауынгер Отан алдында өжеттілік пен қайсарлық танытуы хақ.

Тегінде ата-әжелеріміз ер бала дүние есігін ашқаннан-ақ отбасы алдындағы, Отан алдындағы борышын сезінуге тәрбиелейтінін естіп, көріп, біліп жүрміз. Бесіктен бастап «сен — отбасыңның тірегісің, сен — еліңнің қорғанысың» деген тәрбиемен өскен жігіттің бойынан қамқорлық сезімі есіп тұрады. Еліміздің тарихына көз жүгіртсек, жаугершілік заманда елін, жерін жаудан қорғаған, білектің күшімен, найзаның ұшымен күрескен ата-бабамыздың ерлігі — бізге мұра. Міне, осындай ержүрек бабаларымыздың ұрпағына аманат еткен кең байтақ қазақ жерін келешек ұрпаққа тапсыру — біздің мұратымыз. Асенкритов ауылдық округіндегі Қызылжар ауылының тумасы, Рудный колледжінің студенті болған Қанат Альмуханбетов — Отан алдындағы борышын абыроймен атқарып келген азамат. Жастық жігері мен патриоттық сезімі бойын кернеген Қанат әскерге өзі сұранып кеткен. Қазіргі жастардың ортасында белең алып отырған мәселелердің бірі әскерге бармауға сан түрлі сылтау іздеу болса, Қанаттың іс-әрекеті нағыз ер азаматтың әрекеті дер едік.
Қапшағай қаласындағы 32/363 әскери бөлімшесінде гранаттометші қызметінде борышын өтеді.
«Елді қорғау–ер еншісі» дегендей, баламның ата-бабаларымыздың аманаттап тапсырып кеткен осынау ұлан-ғайыр жерін, еліміздің тыныштығын қорғауға атсалысып, үйге абыроймен оралуын тілейміз,- деп, ауылдас ағайындар шығарып салаған еді. Расында, Отанды қастерлеу, шексіз сүю сезімі отбасы, ошақ қасынан бастау алады. «Адал ұл ер боп туса–ел тірегі» деп есімі аңызға айналған Бауыржан Момышұлы артына өсиет қалдырып кеткендей, өзіне жүктелген міндеттемелер мен тапсырмаларды ерте түсінген өрен ертең халқы мен елінің сүйенішіне айналады.
«Әскерге барғасын жан-жаққа бөлініп кеттік. Қысқа мерзімде әскери тәртіпті, құрал-жабдықтарды қалай пайдалану керектігін, автоматтарды шашып-жинау, тағы да басқа ережелерге баулыды. Ол жақта бәрі тәртіппен, әскери тәртіп есейтті, жақсы мен жаманды айыруды үйретті, Отан алдындағы жауапкершілігімді нығайтты. Өз еркіммен әскерге аттанғаныма еш өкінбеймін, қайта замандастарымды әскерге баруға шақырамын. Бұрынғыдай емес, бір жылда борышыңды өтеп келесің. Әскери қызметті абыройлы міндет деп санаймын», — дейді жас жігіт. Қазір әскер десе сылтаулары дайын тұратын жігіттерімізге Қанаттың ісі үлгі болса екен. Бейбіт күннің бесігін тербеткен батырларымыз ел амандығын алдыңғы орынға қойса, болашағымызға иненің жасуындай қауіп-қатер жоқ. Еліміздің айбынды әскері, тыныштығын күзететін тегеурінді шекарашылары барда бұған толықтай сенуге болады. Бірлігі бекем, төрт құбыласы түгел еліміздің жауынгерлері бізді жауға басындырмайды. Сан жылдар азаттықты аңсап, егемендікті тілеген ата-бабаларымыздың асқақ арманы – тәуелсіздікке қол жетті. Енді бабаларымыз жауға бермеген жерімізге иелік ету міндеті тұр. Ол үшін қасиетті қазақ жерін қорғау — зор мақтаныш. Елімізге қорған болған жауынгерлеріміздің білек күші берік, білімі жоғары, Отанға деген ыстық ықыласы молынан болғай. Сап түзеген сарбаздарымыз Отан алдындағы азаматтық борышын адал атқарып, елімізді бар күш-қайратымен қорғайды. Бұл — халықтың оларға артқан сенімі.

• < Назад
• Вперёд >