Сайт газеты МАЯК

Ұстаз еңбегі - өлшеусіз

Подробности

Категория: Последний номер

Создано 19.12.2024 12:46

Автор: Майра Дүзбайқызы

Просмотров: 78

Қазақстанның болашағын дамыту, көркейту кезек күттірмейтін іс болғандықтан, білім беру саласы, оның ішінде педагог мамандығының беделін арттыру, сапалы білім мен ғылымды жас ұрпақтың санасына сіңіру әрқашанда маңызды.
Ұстаз берген тәрбие әрбір жанның өміріне жол сілтер шырақ секілді. Ғылым иесі ғалым да, батыр да, ақын да, жұмысшы да, егін салған диқан да, мал баққан шопан да бәрі-бәрі ұстаздан білім, тәлім алған. Сондықтан ұлағатты ұстаздарға бүкіл адам баласы құрметпен бас иеді. Ұстаз шәкіртін өмірге баулушы екені белгілі.
«Еңбек адамы» атты тұрақты айдарымыздағы кейіпкеріміздің жетістігі көп, үлгі етерлік істері жетерлік ұстаз Таева Сабира Хамзақызы. Ғұмырының саналы бөлігін шәкірт тәрбиесіне арнаған кейіпкеріміз Жангелді ауданы Албарбөгет ауылында дүниеге келген. Жастайынан ұстаздық жолды таңдаған Сабира Хамзақызы, Торғай педагогикалық училищесін бітіріп, бүгінде №2 Тобыл жалпы білім беретін мектебінде бастауыш мұғалімі болып қызмет атқарады. Отбасылы, 5 баланың анасы, Тобылда қазақ мектебі ашылуына үлес қосқан ұстаз.
Еліміздің болашағы мен қоғамның дамуы үшін ең маңызды сала — білім беру. Бұл саланың дамуына өзіндік үлесін қосып, Таева Сабира Хамзақызы 33 жыл бойы білім әлемінде қызмет атқарған. Өз өмірін балаларға, білім мен тәрбие беру ісіне арнап, кәсіби маман ретінде өз жолын таба білген, көптеген ұрпақтың қалыптасуына зор ықпал еткен тұлға. Сабира Хамзақызы негізгі мақсаты - оқушылардың шығармашылық қабілетін, өздік танымдық біліктілігін дамыта отырып, білім сапасын арттыруды ұйымдастыру. Мұғалім әрқашан білім мен тәрбие процесінде шығармашылықты дамытудың жолдарын іздейді. Ол жаңа әдіс-тәсілдерді енгізіп, оқушыларды тек теориялық біліммен емес, практикалық дағдылармен де қаруландырады. Жаңа технологияларды қолдану арқылы оқыту сапасын арттыру, қазіргі заман талаптарына сай бағдарлама жасау — бұл оның жұмысында үнемі назарда болатын мәселелер. Елімнің болашағы деп үміттенетін бүгінгі жас ұрпаққа білім нәрін сеуіп, еңбексүйгіштік пен адамгершілікке тәрбиелеп, білімі мен өнегесін кішкене бүлдіршіндерге арнап, бойындағы бар күш - жігерін шәкірт тәрбиелеуге жұмсайтын Сабира Хамзақызының еңбегі ерекше. Оның ұстаздық қызметі тек қана жеке жетістіктермен емес, сонымен қатар қоғамның, ұлттың дамуына қосқан үлесімен бағаланады. Оның адалдығы, еңбекқорлығы мен шеберлігі — әрбір ұстазға үлгі болатын нәрсе.
Жұмыс күндері тек сабақ өткізу ғана емес, сонымен қатар әдістемелік көмек көрсету, ата – аналар жиналыстарын өткізу, семинарларға қатысу, шеберлік сыныптарын өткізу, сараптамалық кеңесте жұмыс істеу және шығармашылық конкурстарға қатысу. Сабира Хамзақызының еңбегі көптеген мадақтамалармен, дипломдармен және алғыс хаттармен марапатталды.
Сабира Хамзақызының айтуынша, егер оған қайтадан мамандық таңдау мүмкіндігі берілсе, ол өз халқының тарихы мен мәдениетін таразылап, рухани құндылықтарды бойына сіңіретін, елжанды тұлға тәрбиелеу жолын қайта таңдайтын еді дейді. Сабира Хамзақызы әріптестерінің мүддесін қорғап, әлеуметтік маңызы зор жобаларға да белсене атсалысады. Бойына адалдық, әділдік, қамқорлық, еңбекқорлық сынды жақсы қасиеттерді жинай білген ұстаз оқушылар мен ұжымдастарына сыйлы, ата-аналар арасында үлкен құрметке ие.
Сабира Хамзақызына жұмысына табыс, мықты денсаулық, отбасына амандық тілейміз. Шәкірт тәрбиелеу жолындағы елеулі еңбегіңіз жемісін берсін!

• Вперёд >