Сайт газеты МАЯК

Мәжіліс депутаттары ауданда болды

Подробности

Категория: Главное

Создано 08.05.2019 07:38

Автор: А. Ниязбек

Просмотров: 957

Ауыл – аймақтың әлеуметтік жағдайы қалай? Елбасы қабылдаған бағдарламалар облыстарда, аудандарда қалай орындалып жатыр? «Нұр Отан» партиясы бағдарламаларының жүзеге асырылуы қалай? Осы сұрақтардың жауабын білу үшін Парламент Мәжілісінің депутаттары Қостанай өңіріне сапарға шыққан еді.

Өткен бейсенбі күні Парламент Мәжілісінің депутаттары Гүлнар Бижанова мен Мұрат Теміржанов Таран ауданына ат басын бұрып келді. Халық қалаулылары жергілікті билік өкілдерімен бірге бірнеше нысандарда болып, жұртшылықпен жүздесті.
Бірінші кезекте депутаттар Тобыл кентінде тұратын көпбалалы Смирновтар отбасында болып, олардың жағдайларымен танысты. Айта кетейік, жыл басында Смирновтар отбасына жергілікті кәсіпкер төрт бөлмелі үй алып берген еді. Халық қалаулылары бес баланы дүниеге алып келген отбасыға ризашылықтарын білдіріп, мемлекет көпбалалы аналарды әрдайым қолдайтындығын жеткізді.
Мұнан кейін «Викторовский» ЖШС-не барған Мұрат Баритович пен Гүлнар Кадиржановна мал шаруашылығын дамыту жұмыстарының барысынан хабар алды. Сүтті ірі қара мал өсіретін шаруашылықтың қызметкерлерімен кездесіп, пікір алысты. Аталмыш шаруашылықтың директоры И.Кулик айналысып отырған кәсіптің қыр-сырын қысқаша әңгімелеп берді.
Іс-сапар соңында депутаттар кеңейтілген мәжіліске қатысты. Аудан әкімі Қ.Испергеновтың төрағалық етуімен өткен мәжіліске ауылшаруашылығы кәсіпкерлері, ауыл әкімдері және басқа да сала мамандары қатысты.
Активте сөз алған Мұрат Теміржанов Парламент Мәжілісінің қабырғасында атқарылып жатқан жұмыстармен таныстырып өтті. Сондай-ақ, ауылшаруашылығы саласын дамытуға бөлінетін несиелер туралы әңгімеледі.
Мәжіліс соңында депутаттар халық тарапынан қойылған сұрақтарға жауап берді.

• < Назад
• Вперёд >