Ата бабасының жолын жалғап отырған ауылдықтар

b_600_290_16777215_00_images_images_2018_45_45-2018_2.JPGТүйе мен жылқы – ежелден өсіріліп келе жатқан табысты түлік. Сойсаң – ет, саусаң – сүт, жүні мен терісі де бағалы шикізат болып табылады. Шаруашылықта ірі қара малмен, қоймен бірге түйе мен жылқы өсірудің тиімділігі ұшаң теңіз. Қуантарлығы, өңірімізде түйе шаруашылығымен де, жылқы шаруашылығымен де айналысатын ауылдықтар кәсібінің жемісін көруде.


«Мен осыдан бірнеше жыл бұрын мемлекеттің қолдауымен төрт миллион теңге көлемінде несие алып, бес бас түйе сатып алдым. Алған несиемді екі жылдың ішінде төлеп тастадым. Ал, жақында «Бастау-бизнес» жобасының курсын тәмамдап, сертификат алған болатынмын. Содан тағы да алты пайызбен бес миллион теңге несие алып, Атырау облысынан алты түйе сатып алдым. Бір өркешті, екі өркешті түйелерімнің айырмашылығы – олардың бірі етті, енді бірі сүтті болып келеді. Өзбекстанда тұрғанымызда әке-шешем де, ата-бабаларым да осы түйе шаруашылығымен айналысқан-ды, сондықтан түйенің қыр-сырын меңгергем. Түйелер жыл бойы сауылады, бірақ олардың ерекшелігі – олар екі жылда бір рет боталайды», - дейді Юбилейный ауылының тұрғыны Алмат Нұрмаханов. Түйенің сүті мен шұбатын қолжетімді бағамен саудалайтын кейіпкеріміз- дің өніміне сұраныс көп.
Түйенің сүтін сауып, өнімін сатып, кәсібін бастап кеткен кәсіпкер тәжірибесіне сүйене отырып, майда-шүйдеге емес, бірден төрт түліктің төресі – түйе бағып, оны көбейтуді мақсат тұтты. Көздеген мақсатына жету үшін тәуекелге барған кісі қазір кәсіпкерлердің іс жүргізуіне мемлекеттен барынша қолдау барын, әсіресе, мемлекеттік бағдарламалардың тиімділігі зор екендігін атап өтті. Түйе ыстыққа да, суыққа да өте төзімді болғанымен, олардың күтіміне ерекше мән береді. Алмат ағайды тыңдасаңыз, оның түйе шаруашылығы жайлы, расымен де, көп мәлімет білетіндігіне көз жеткізесіз. Мемлекеттің қамқорлығымен осылайша шаруасын ширатып жүрген Алмат Нұрмаханов әлі талай іс тыңдырады деген сенімдеміз.
Ал, жылқы шаруашылығымен айналысатын Набережный ауылдық округінің тұрғыны жүйрік аттарды жаратып, бәйгеге қосуды жергілікті жеткіншектерге үйретіп, ата-бабасының дара жолын жалғап отырған адамдардың бірі Ерназар Дуанов. Өкінішке орай, Елизаветин ауылына жолымыз түскенімізде бұл кісімен қауыша алмадық, десек те, ауылдық балалардың ат жарыстарына дайындық сәтінің куәсі болдық. «Өзгелермен иық тіресе алатындай дәрежеге жету үшін спорт әдіскері Жайылхан Құлқаев балалардың қызығушылығын арттырып, ұлттық спорттың дамуына мол үлесін қосуда. Ауылымызда атқұмар балалардың қатары жыл сайын артып келеді. Аттан алыс өскен баланың бойында қазақылық болмайды. Атқа мінген бала бауырмал, ержүрек, еңбекқор болып өседі. Кішкентай шабандоздарымыз түрлі жарыстарға қатысып, жүлделі орындарға ие болып жүрген жайы бар. Жақында ғана Қостанайда өткен жарыстан бірінші орынмен оралдық. Қазір бізде он екі айғыр, команданың «Таран ауданы» деген жазуы бар арнайы киімдеріміз бар», - дейді ауылдық округ әкімі Талғат Түйтебаев. Жаттықтырушының айтуынша, ол шабандоздардың кенжесі Асқарды үш жарым жасынан дайындаған көрінеді. Фотосуреттегі Ерлан, Нағашыбай есімді бозбалалармен қоса есептегенде, күн сайын ауыл сыртындағы ипподромда, яғни ат жарысы өтетін алаңда рухы биік жиырма бала дайындалады.
Айта кету керек,мысалы, көкпаршы ойын алаңына шыққанда, біріншіден, аттың күші, екіншіден, көкпаршы өзінің ептілігімен серкені тақымына басады. Аттың ықпалы көп, яғни тоқсан пайызы атқа байланысты. Жануарды жаратып, жемшөбін дайындаумен қатар, оны жарысқа апару керек. Осындайда өңірімізде ат спортына жаны ашитын ат төбеліндей азаматтардың бары қуантады. Мүмкіндікті пайдалана отырып, демеушілік жасап жүрген аудан кәсіпкерлері Владимир Бушкинге, Жұмағазы Темірбаевқа шексіз алғысымызды білдіреміз.


 
Яндекс.Метрика
Курс валют в Казахстане