Теміржолдағы нәзіктік пен төзімділік

Подробности: Категория: Последний номер; Создано 06.03.2025 12:07; Автор: Майра Дүзбайқызы; Просмотров: 475

Теміржол – жоғары жауапкершілікті, ұқыптылық пен кәсіби шеберлікті талап ететін сала. Осы саланың дамуына өз еңбегімен үлес қосып жүрген жандардың бірі – Беисова Лазат Абдикуловна, ол Тобыл станциясында желілік байланыс бөлімінде электромеханик-қабылдаушы болып жұмыс істейді.
Отбасылы, жолдасы теміржолда жұмыс жасайды. 3 баланың анасы. Беисова Лазаттың жұмысы – теміржолдағы электр жабдықтарының, автоматика және байланыс жүйелерінің дұрыс жұмыс істеуін қадағалау. Ол пойыздардың қозғалысын реттеуге, бағыттамалар мен сигнал беру құрылғыларының ақаусыз қызмет етуіне жауапты. Әрбір тетік пен механизмнің мінсіз жұмыс істеуі – жолаушылар мен жүк тасымалының қауіпсіздігіне тікелей әсер етеді. Лазат Абдикуловна теміржол саласына үлкен қызығушылықпен келген. Алғашында ол бұл кәсіптің қыр-сырын меңгеру үшін көп ізденді, тәжірибелі мамандардан үйренді. Уақыт өте келе, ол өз ісінің шебері атанып, үлкен жауапкершілікті міндеттерді өз мойнына алды. Оның еңбекқорлығы мен біліктілігі басшылық тарапынан жоғары бағаланып, бірнеше рет алғыс хаттар мен марапаттарға ие болды. Ол жас мамандарға тәлімгерлік жасап, оларға электромеханик-қабылдаушы қызметінің қыр-сырын үйретеді. 20 жыл осы салады еңбек еткен Беисова Лазат үшін теміржол – жай ғана жұмыс орны емес, өмірінің бір бөлігі. Ол болашақта өзінің тәжірибесі мен білімін жастарға үйретуді мақсат етеді. Лазат Абдикуловна сияқты мамандардың еңбегі – теміржол қауіпсіздігі мен сенімділігінің кепілі. Ол өз ісін сүйіспеншілікпен атқарып, теміржол көлігінің үздіксіз әрі қауіпсіз жұмыс істеуіне үлес қосуда.
- Құрметті теміржол саласындағы әріптестер, аяулы арулар мен асыл аналар! Сіздерді көктемнің шуақты мерекесі – 8 Наурыз Халықаралық әйелдер күнімен шын жүректен құттықтаймын! Әр күндеріңіз қуаныш пен шабытқа толы болып, еңбектеріңіз жемісті болсын! Сіздерге мықты денсаулық, баянды бақыт, отбасыларыңызға амандық, ал жүректеріңізге шексіз махаббат пен шаттық тілеймін! Көктемнің әрбір күні сіздерге қуаныш, ал әр сапар сәттілік әкелсін!- деп, құттықтады теміржолшы - ана Беисова Лазат Абдикуловна.