Сайт газеты МАЯК

Набережныйлықтар наурызды қалай тойлады

Подробности

Категория: №13 (10333) от 29 марта 2018 года

Создано 29.03.2018 06:19

Просмотров: 3467

Наурыз мейрамын шығыс әлемінің барлығы дерлік ерте дәуірден бастап тойлап келеді. Ұлыстың Ұлы күніне орай ұйымдастырылған мерекелік іс-шаралар ауданымыздың ауылдық округтерінде, соның ішінде Набережный өңірінде де өтті.

Елизаветинка ауылының тұрғындары ауа райы қолайсыз болғандықтан, жаңа жылды қарсы алу үшін жергілікті мәдениет үйінде жиналды. «Набережный ауылдық округі – шағын ғана шаттық шаңырағы десек болады. Мұндағы көпұлтты халық бір үйдің баласындай тату-тәтті. Бұл күні осы жұрт мәре-сәре күй кешіп, бір-бірін жыл басымен құттықтап жатты. Ұлыстың Ұлы күніне арналған мерекелік іс-шараны ауыл әкімі Талғат Түйтебаев ашты. Ол тұрғындарды осынау айтулы мейраммен құттықтап: «Наурыз – ренжіскен ағайын табысып, барлық жамандық ұмытылатын, жақсыға қарай бет бұратын күн. Игілікті істерге, бейбітшілікке, бірлікке, ізгілікке, қайырымдылыққа, тағы да басқа ізгі істерге шақыратын бұл мерекенің мәні зор. Ұлтымыздың ұлылығын ұлықтаған, дәстүрімізді дәріптеп, ізгілік пен мейірімділікке, бейбітшілікке бастайтын Наурыз мерекесі баршаңызға құтты болсын!» – деген жылы лебізін білдірді», - дейді ауыл мектебінің мұғалімі Қуаныш Есқабыл. Оның айтуынша, одан кейін кезек концерттік бағдарламаға берілді. Ауылдың жезтаңдай әншілері мен мың бұралған бишілері думанды тойдың көркін келтірді. Мерекелік шара соңында ауылдықтар Наурызкөжеден дәм татып, үйлеріне қимай тарқасты.

Ал, Набережный орта мектебінде көпшіліктің көңілінен шыққан «Нұр себеле, Ұлыстың ұлы күні!» іс-шарасы өтті. Оқу мекемесінің директорының тәрбие жұмысы жөніндегі орынбасары Ұлзира Құлбазарованың мәліметіне сүйенсек, бұл күні білім ордасының мәжіліс залында ине шаншар орын болмады. Салтанатты шараның басында ұстаздар, оқушылар мен ата-аналарды Наурыз мерекесімен мектеп директоры Аманжол Баянбаев құттықтады. Одан кейін Бейімбет, Ахмет, Абай, Мұқағали, Ыбырай ауылдарына бөлінген сыныптар 4 кезең бойынша өзара бақ сынасты.

Алдымен, олар өз ауылдарын таныстырып, атауы туралы кеңінен мағлұмат берді. Екінші кезеңде ауылдар тұсаукесер, қыз ұзату, сәбиді бесікке бөлеу, беташар, сыңсу сияқты дәстүрлерді дәріптеді. Үшінші кезең ұлттық спорт ойындарына арналды. Көрермендер оқушылардың арқан тартысын, асық ойынын, қол күресін тамашалап, ерекше әсер алды. Шешуші кезеңде жастар ән-биден шашу шашып, қара жорғаны топ болып биледі. Мерекелік іс-шараның қорытындысы бойынша барлық ауыл өкілдеріне арнайы аталымдар мен алғыс хаттар табысталды.

• < Назад
• Вперёд >