«Ата-әулеттің тірегі, әже- ұрпақтың жүрегі»

28 қыркүйек күні Новоильинов орта мектебінде Қарттар күні қарсаңында «Болашаққа бағдар; рухани жаңғыру» бағдарламасы аясындағы «Ата-әулеттің тірегі. Әже- ұрпақтың жүрегі» атты рухани кеш өткізілді.
Бұл іс-шара ток-шоу,сыр-сұхбат ретінде өтті.Мектеп оқушылары қарттарға «Сіздердің отбасында қалыптасқан дәстүр туралы айтып өтсеңіз?», «Бала тәрбиесінде қандай қағидаларды ұстанасыз?», «Қазіргі жастардың тәрбиесіндегі олқылықтарға кімді кінәлар едіңіздер?», «Әже тәрбиесі мен ана тәрбиесі арасындағы ұқсастық пен айырмашылықтар қандай?», «Бақытыңды балаңнан ізде деген сөздің мағынасын қалай түсінесіз?», «Немере өз балаңнан да тәтті дегенді қалай түсінуге болады?» сынды әртүрлі сұрақтар қойып,өнегелі жауаптар алды. Ең қызықты сұрақ қойған оқушылар әжелерден кішігірім сыйлық алды.
Кеш жүргізушілері Асет Еркебулан мен Сағындықова Ақзейнепханым әжелер мен оқушылар арасында сұхбат жүргізіп,кездесудің жағымды да сенімді атмосферасын шебер сақтай білді.Бастауыш сынып оқушылары әжелеріне арнап өлеңдер оқып,көрініс көрсетіп,ән айтты.Мектептің мақтанышы аудандық,облыстық сайыстарының жүлдегері 11 А сынып оқушысы Асет Еркебулан қонақтарға арнап өзінің шығармашылығынан таңдаулы өлеңдерін оқыды.Сонымен қатар, қазіргі заманның ауыр жарасы «Қарттар үйлері» туралы да сөз қозғалды. Осыған орай, 11 сынып оқушысы Алин Дастан «Қара шалдың зары» атты монологын оқып, қарт кісілерді бір толқындырды. Кім де кімнің үйінде қартайып отырған әке – шешесі немесе атасы мен әжесі секілді қымбатты «қонағы» болса, ол үйіне олардан артық құдайдың құрметті өкілі келеді деп ойламасын, егер үйдің иесі оларға дұрыс қарап, қамқорлық жасаса, қартайған ата – анасы оның отбасының құты болып табылады. Қарт кісіні құт – береке деп танысақ, ол ұрпақ көрегендігі. Ұрпағы құрметтеген ата – ана әр кезде де бақытты дей келе, оқушыларға қарттарымыз да біздің ұлттық құндылық екені түсіндіріліп өтті. Кеш соңында қонақтар,ұстаздар,оқушылар әжелеріміздің жас кезіндегі хит болған «Әнім сен едің» атты әнін караоке арқылы бірге орындап шықты.Рухани кеш қатысушылары алған әсерлерін әртүрлі смайликтер арқылы білдірді. Іс-шара әжелердің ақ батасымен аяқталды.


 
Яндекс.Метрика
Курс валют в Казахстане