Ауыл қарттары құрметтен кенде емес

b_600_290_16777215_00_images_images_2018_40_40-2018-2.jpgХалқымыз қашан да дария көңіл, кең кеуде қарттарымен мақтана білген. Ақсақалы мен ақ шашты ананы қадірлегені соншалық, ақ киізге орап, көтерген екен. Бүгінде біздің аталарымыз бен аналарымыз да сондай құрметтен кенде емес. Әсіресе, халықаралық Қарттар күнінде ұйымдастырылатын мерекелік бағдарламалар орны – төр, қатары – алдыңғы саптағы ауыл қарттарын қуанышқа бөлейді.


«Қазан айының бірінші жұлдызына тап келген мейрам ауылымызда жыл сайын атап өтіледі. Өз басым, қазыналы қарттарымыздың бір сәтке болса да көңілін көтеріп, өмірлеріне қуаныш сыйлауда үлкен тәрбиелік мән бар деп есептеймін», - дейді Белинский ауылдық округінің әкімі Саят Ахмеджанов. Егде жастағы кісілерге музыкалық құттықтауларын жеткізген жергілікті және Жаслан Құрманғалиевтің жетекшілігімен тобылдық өнерпаздардың арқасында аталмыш іс-шара той-думанға ұласты десек, артық айтқанымыз болмас. Жиналғандар ән айтып, би билеп, жақсы көңіл-күймен тарқасты. Мүмкіндікті пайдалана отырып, ауылдық әкімдіктің атынан демеушілік жасаған жанашыр кәсіпкерлер Рамазан Скендировқа, Николай Шахалайға, Мырзахан Тулендинге, Мұрад Бекеновқа алғысымызды білдіреміз.
Бұл күні Набережный ауылдық округінің қариялары да мәз-мейрам болысты. Ауылдың мәдениет ошағының меңгерушісі Жансұлу Костылеваның айтуынша, кешті мәдениет саласының ардагері Татьяна Тямчик жүргізді. Тамаша мерекелік концертті ұйымдастыруға ауылдық тұрғындар да, аудан орталығынан арнайы барған өнер иелері де атсалысты. Ән мен биге толы болған іс-шара барысында жылы тілектер де, құттықтаулар да айтылды. Ауылдық округ әкімі Талғат Түйтебаев та зейнет жасындағы жерлестерін құттықтап, оларға ілтипатын көрсетті. Ұйымдастырушылар айтулы ұмытылмас кешті ұйымдастыруға ұйытқы болған, әрдайым халқына жақын округ әкіміне ризашылығын білдіреді. Шексіз алғысын көпшіліктің алдында 80 жасқа толуына байланысты құттықтау қабылдаған Александра Екимова да білдірді. Зымыраған сағат тілінің шексіз тықылдап соғуына мән бермей, уақыттың қалай жылдам өтіп кеткенін сезбей қалған ата-әжелеріміздің батасын алудың өзі бір ғанибет емес пе, ағайын?...
Красносельск ауылының кәсіпкері Александр Пирог та Қарттар күнін атап өтуге өз септігін тигізді. Мерекелік кешке демеушілік жасап қана қоймай, құттықтау сөзінде егде жастағы кісілерге жем үлестіріп беруге уәде берді. Ауылдық округ әкімінің міндетін атқарушы Азамат Бердалинов та жамағатқа өзінің жылы лебізін білдіріп, салтанатты түрде «Сұлу» ЖШС-нің директоры Александр Пирогқа аудандық білім беру бөлімінің «Жомарт жүрек» мадақтамасын табыстады. Атап өту керек, жомарт жүрек, қолы ашық ел азаматы жыл сайын ауылдың ата-әжелерін құттықтап, дастарқан жаюмен қатар, білім саласына да, өзге салаларға да материалдық тұрғыдан үнемі барынша жәрдемдесіп жүреді. Жиналғандардың бірі марапаттауларға ие болса, енді бірі сахна төрінде ән салып, өнерлерін паш етті. Жалпы, мерекелік отырыс, әдеттегідей, жақсы өтті десек те болады. Ауылдық және сырттан барған өнерлі жандардың жүректен шыққан әсем әуендері жүрекке жете білді.


 
Яндекс.Метрика
Курс валют в Казахстане