Өнері әкесінің қанымен, анасының сүтімен дарыған

b_600_290_16777215_00_images_images_2018_42_42-2018_1.jpgЫқылым заманнан ынта-пейілі өнерге ауған Торғай өңірінің «әу» демейтін қазағы жоқ шығар. Ән-жыр, күй десе, ішкен асын жерге қоятын осы өңірдің тумасы Әлия Таласбекова да білім саласының маманы болса да, табиғи болмысын, бойына дарыған өнерін шығармашылықпен шыңдауда.


Әлия Таласбекованың әкесі мен анасының музыкалық білімдері болмаса да, өнерге жақын адамдар. «Олар жас кездерінде «Арай» музыкалық ансамблін құрастырып, көрші ауылдарды аралап, жұмысшылардың көңілдерін сейілтіп, концерт беріп жүретін. Сол өнерлерін тастамай, балаларына, яғни бізге үйретті. Әкем кішкентайымда домбыраға, баянға әуестігім болғандықтан, осы аспаптарды ойнауға үйретті.Әлі есімде... Баянды іздеп жүріп, арнайы Алматыға барып, маған әкелген болатын. Сол кезден-ақ түрлі байқауларға, айтыстарға қатыстырды. Еңбегіміз зая кеткен жоқ. 3-сыныпта оқып жүргенімде облыстық айтыстан жүлделі 3-ші орынды жеңіп алдым, 6-сыныпта Арқалықта өткен республикалық «Әнші балапан» байқауында лауреат атандым. Қазіргі таңда Николаев мектебінің қазақ тілі мен әдебиеті пәнінің мұғалімі болып жұмыс істеп жүрген жайым бар. Бірақ, өнерге деген жақындығым әкем мен шешемнің қанынан тараған. Отбасымыздағы бауырларымның бірі домбырада, енді бірі баянда ойнайды, сіңлім екеуміз бірге ән айтатын едік. Асқар таудай әкемнің жетекшілігімен Торғайда отбасылық ансамблімізбен сахна төрінде өнер көрсететінбіз», - дейді әңгімеміздің арқауы болған Әлия Амантайқызы.
Мектепті бітіргеннен кейін мұғалімдікті таңдаған Әлия Таласбекова реті келгенде сахнаға шығып, өнерімен тамсандыруға тырысады. Аудандық мәдениет үйімізде ұйымдастырылған мерекелік концерттердің бірінде көрермендердің қошеметіне бөленген орындаушының табиғаты Жанар Айжановаға, Мәдина Ералиеваға, Жазира Байырбековаға жақын болғандықтан, аталған әншілердің әндерін сүйіп тыңдайды, көбінесе, халық әндерін де орындайды екен. Әлия Амантайқызының үлкен қызы би билеуді, ал екінші қызы ән айтуды ұнататын көрінеді. «Өнер атаның қанымен, ананың сүтімен дариды» деген осыдан шыққан болар. Естеріңізде болса, қазақ күй тарихындағы Құрманғазы, Дәулеткерей, Шалмырза, Қазанғаптардың бірі де ешқандай нота білмеген. Сонда да олар біздің қазақ тарихындағы асқан дәулескер күйшілер болды. Осылардың ғұмыр жолдары, тұрмыс-тауқыметі де әралуан өтті. Мысалы, Құрманғазы өте жарлы болса, Дәулеткерей дәулетті, малды кісі еді. Елдің сүйіспеншілігіне бөлену үшін музыкалық білімнің болуы міндет емес екендігіне еріксіз көз жеткізесің. Солай емес пе?... Айтпағымыз, «бұйырған кетпейді» демекші, ұлттық өнерді дәріптеуші Әлия Таласбекова сияқты дарынды жандар үшін, ең бастысы, көптің қошеметі.


 
Яндекс.Метрика
Курс валют в Казахстане