Бірі жоғалтса, екіншісі табады

Егер біреу көшеден қымбат затыңызды тауып алса, онда заң бойынша оның Сізден заттың құнының аздаған пайызын талап етуге құқығы бар ма?


Жоғалған затты тауып алушы бұл туралы оны жоғалтқан адамға, заттың меншiк иесiне, оны алуға құқығы бар өзiне белгiлi басқа адамдардың бiреуiне дереу хабарлауға және табылған затты оған қайтаруға мiндеттi. Егер зат үй-жайдың iшiнде немесе көлiкте табылған болса, ол иесi болып табылатын адамға тапсырылуға тиiс. Мұндай ретте осы иеленушi затты тапқан адамның құқықтарын иеленiп, оның мiндеттерiн мойнына алады.
Егер табылған затты алуға құқығы бар адамның өзi немесе оның тұрған жерi белгiсiз болса, затты тауып алушы олжа туралы iшкi iстер органдарына немесе республикалық маңызы бар қалалардың, астананың, аудандардың, облыстық маңызы бар қалалардың жергілікті атқарушы органдарына мәлiмдеуге мiндеттi. Есіңізде сақтаңыз, затты тауып алушы оны өзiнде сақтауға, немесе аталған органдардың, немесе олар көрсеткен адамның сақтауына тапсыруға құқылы.
Ең қызықтысы, Қазақстан Республикасының азаматтық кодексінің 245-ші бабы бойынша затты тауып алушы затты алуға заңды құқығы бар адамнан зат құнының отыз процентi мөлшерiнде сыйақы алуға құқылы. Егер табылған зат оны алуға заңды құқығы бар адам үшiн ғана құнды болса, сыйақының мөлшерi тараптар есептеп шығарған баға бойынша белгiленедi. Ал, егер тауып алған азамат мөлшерден көп сұрап, мысалы, құжатты иесіне қайтармаса, онда ол адамды қылмыстық жауапкершілікке тартады.
Өмірде түрлі жағдайлар болады. Сондықтан, құжаттарыңыз, ұялы телефондарыңыз немесе басқа да құнды заттарыңыз жоғалса, жергілікті ішкі істер бөліміне арыз жазуыңызға болады.


 
Яндекс.Метрика
Курс валют в Казахстане