Сайт газеты МАЯК

«Жас тұлпарымыз» жеңіспен оралды

Подробности

Категория: Главное

Создано 06.04.2023 07:14

Автор: Майра Дүзбайқызы

Просмотров: 1207

Сан ғасырларды көктей өтседе тарихи тұрғыдан ешқашан құнын жоймаған, ең бастысы елдiң жүрегiнен, жадынан еш уақытта көшпеген шынайы өнер жарысы - айтыс бүгiн де рухани өмiрiмiздiң алтын дiңгегi болып отыр. Осы өнердiң мәңгiлiк жасампаз көрiнуiнiң басты сыры да - осы ұлттық сөз өнерiнiң құдiретiнде, осы халықтық өнердiң көркемдiк, рухани астарында жатыр. Ал ендi шынайы ұлттық өнер, халықтық шығарма тек қана тума таланттың еңбегiмен ғана келедi.
«Жас тұлпар» ақындар айтысы өңірдегі талай талапкер жасты үлкен өнерге, үлкен өмірге қанаттандырды. «Жас тұлпар» түлеткен жас ақындардың көбі - бүгінде еліміздің әр түкпірінде өрелі өнерімен, адал еңбегімен танылып, өзінің ақындық, азаматтық биігіне қол жеткізген азаматтар.
29 наурыз күні Арқалық қаласында Торғайдың топ жарған халық ақыны Нұрхан Ахметбековтың 120 жылдығына арналған «Жас тұлпар» облыстық оқушылар айтысы өтті. Айтысқа 10 жас айтыскер қатысты. Бейімбет Майлин ауданы Тобыл кентінен республика, облыстық айтыстардың жеңімпазы ақын Изтилеу Мамай Тұрысбекұлы тәрбиелеген шәкірт №2 Тобыл жалпы біліи беретін мектебінің 5 сынып оқушысы Перизат Амин қатысып, жүлделі 1 орын алып, диплом мен ақшалай сыйлық ие болды. Кішкентай ақын бұл айтыста ең биік тұғырдан көрінді.
Мамай Тұрысбекұлы Изтилеудің айтуынша, оқушылар айтысы Қостанай облысында 1994 жылдан бері қарай дәстүрлі түрде үзілмей өтіп келе жатқан оқушылар айтысы. «Жас тұлпар» айтысынан түлеп ұшқан түлектердің алды республикалық аламандарда осы Тобыл-Торғай өңірінің намысын қорғап жүр. Сондықтан алдағы уақытта бұл айтыс үзілмей жалғасын таба беруі керек.
- Шәкіртім Перизат Амин бірінші рет додаға түссе де, қарсыластарынан басып озды. Өнерпаз өрен болашақта бағындыратын белестерінің биік екенін аңғардым. Аудандық білім бөлімінің басшысы Айгүл Темірханқызы Алимбаеваға айтар ұсынысым бар, жылда аудан бойынша оқушылардың Абай, Махамбет оқулары өтеді, сол сияқты аудандық оқушылар айтысын өткізу қолға алынса деймін. Осы оқуларға орыс мектептерінен оқушылар қатысып, қызығушылық танытады. Айтыс өнерін де дәріптеп мектептерге міндеттесе, айтыс өнеріне де қызығушылықтарының артатыны сөзсіз. Жыл сайын облыстық айтысқа барып, жеңімпаздар да, арнайы жүлдемен оралғандар шәкірттерім бар. Білім бөлімінен айтысқа деген қолдау болса, жасөспірім балаларды айтысқа жетелеуге көмектессе, мәдениет саласы баптап, шоқтығы биік өнер айтысқа Бейімбет ауданының қосар үлесі зор болар еді,- деп өз пікір ұсынысымен бөлісті Мамай Тұрысбекұлы.
Ата-бабамыздан бері келе жатқан көне, ұлттық өнерімізді келешек ұрпағымызға насихаттап, айтыс ұйымдастырылып отырса, нұр үстіне нұр болары сөзсіз.

• < Назад
• Вперёд >