«Олардың әрқайсысын өз баламдай көремін»

b_600_290_16777215_00_images_images_2018_40_40-2018-7.jpgТәрбиеші мамандығы – ең игілікті мамандық. Себебі, ол өзінің білімімен, ақыл-парасатымен, бүкіл болмысымен еліміздің болашақ азаматының тұлғасын сомдап, дамытуға, тәрбиелеуде маңызды рөл атқарады. Осы орайда, мереке қарсаңында С.Ерғалиев атындағы мектеп жанындағы интернаттың ардақты тұлғаларының бірі Айслу Жамангузова жайлы сыр шертпекпіз.


«Менің кіндік қаным тамған жерім – Қызыл-жар ауылы. Жергілікті мектептің 8-сыныбын тәмамдаған соң, Жітіқара ауданындағы училищеге оқуға түстім. Бір жылдан кейін қолыма көкөнісші мамандығы бойынша дипломымды алып, еңбек жолын Маңғышлақта бастадым», - деп сұхбатымызды бастаған Айслу апайдың бір шешім қабылдаса, ойынан қайтпайтынын әңгімемізді өрбіте келе байқадық. Кейін ол арнайы білім алғанымен мал дәрігері болуға шешім қабылдап, қостанайлық ауылшаруашылық училищесіне оқуға түседі. Бұл жолы да Айслу Жамангузова таңдаған мамандығы бойынша ветеринар болып жұмыс істейді. Ал, 1997 жылы аудан орталығында мектеп интернаты ашылғанда, көмекші болып жұмысқа орналасыпты.
«Алғашқы жылы интернатта барлығы он жеті-ақ бала болатын.Әлі есімде, олардың он төрті Моңғолиядан келген-ді. 2003 жылы «Дарын» деген атаумен интернатымыз дарынды балаларға арналған мекеме болып өзгертілді. Шынымды айтсам, балалармен тез тіл табысып кететіндігімнен, жұмыста еш қиналғаным жоқ. Сол кездегі балалар бүгінде ер жетіп, есейіп, тұлға, отағасы, отанасы ретінде қалыптасты. Әлі күнге дейін мектептен түлеп ұшқан балаларым хабарласып отырады. Көшеде көрісіп қалсақ та, «Айсұлу апай» деп жүгіріп келіп, құшақтай бастайды. Олардың әрқайсысын өз баламдай көремін», - дейді Айслу Темірханқызы. Кезінде интернатта жатып, оқушы кездерін еске алушы жандардың айтуынша, олар Айслу апаймен сырласып, ақыл-кеңесін алатын.
Ұзақ жылдар бойы интернатта қызмет істеп, зейнетке шыққан Айслу Жамангузова мен Роза Арғынбаеваның қауышқандағы әңгімесінің арқауы интернаттың өмірі, балалар екен. Себебі, ұл-қыздардың туғанындай болып кеткен тәрбиешілер үшін интернат жиырма жылдың ішінде екінші үйіне айналды. Кейіпкеріміздің сөзіне қарағанда, интернат қабырғасында ұйымдастырылатын әр мерекелік іс-шараны өткізгенде, міндетті түрде олардың көңілдері үшін мақтау айтып, шағын сыйлықтар үлестіріп беретін. С.Ерғалиев атындағы мектеп жанындағы интернаттың меңгерушісі Гүлсім Шоңғалова да Айслу Жамангузоваға мінездеме бере отырып, оның адамгершілігі мол, қызметіне жауапкершілікпен қарайтын, ұжымда құрметті екендігін ерекше атап өтті. «Айслу Темірханқызы далаға отыз баламен серуендеп шықса, отыз баланың әрқайсысына кәмпит сатып алып беретін», - дейді ол.
Қазіргі таңда мейірімін төгіп, қамқорлығын аямайтын аяулы жанның немерелерінің қуанышына бөленіп жүрген жайы бар. Жиырма жылдай интернат қабырғасындағы балаларға тәлім-тәрбие беріп, жақсы қасиеттерді бойларына дарытып, адамгершілік рухта бағыт-бағдар беруде еңбегі зор тәрбиешіге денсаулық, қажымас қайрат, таусылмас бақыт, талмас қанат тілейміз!


 
Яндекс.Метрика
Курс валют в Казахстане